អាហ្វ្រិកខាងត្បូង៖ អាជ្ញាធរសុខាភិបាលអាហ្រ្វិកខាងត្បូងបាននិយាយថា វ៉ាក់សាំងកូវីដ-១៩ ប្រហែល ១០ម៉ឺនដូសរបស់ Pfizer អាចនឹងត្រូវបំផ្លាញនៅចុងខែនេះ ដោយសារតែការប្រើប្រាស់យឺតយ៉ាវហើយវាហួសសុពលភាព។

ប្រទេសអាហ្រ្វិកខាងត្បូងបានកត់ត្រាការឆ្លង និងការស្លាប់ដោយសារមេរោគឆ្លងច្រើនបំផុតនៅទ្វីបអាហ្រ្វិក ទោះជាយ៉ាងណាក៏ដោយ ដោយសារការចាក់វ៉ាក់សាំងបានថយចុះ ហើយប្រទេសនេះមានស្តុកវ៉ាក់សាំងគ្រប់គ្រាន់ប្រហែល ២៥លានដូស។

រដ្ឋមន្ត្រីក្រសួងសុខាភិបាល Joe Phaahla បានប្រាប់សន្និសីទសារព័ត៌មានតាមអ៊ីនធឺណិតថា៖«វាមានហានិភ័យដែលថាវ៉ាក់សាំងលើសពី ១00,000 ដែលនឹងផុតកំណត់នៅចុងខែមីនា ... ប្រហែលជាត្រូវបោះចោល»។

លោកក៏បាននិយាយដែរថា ប្រទេសអាហ្វ្រិកខាងត្បូងកំពុងព្យាយាមបង្កើនការចាក់វ៉ាក់សាំងដើម្បីកុំឱ្យថ្នាំហួសសុពលភាពទាន់ជៀសវាងបោះចោល ខណៈមកទល់ពេលនេះអាហ្រ្វិកខាងត្បូងបានចាក់វ៉ាក់សាំងយ៉ាងពេញលេញប្រហែល ៤៣% នៃមនុស្សពេញវ័យ ៤០លាននាក់។

អាហ្វ្រិកខាងត្បូង បានបើកយុទ្ធនាការចាក់វ៉ាក់សាំងដោយប្រើវ៉ាក់សាំង Johnson & Johnson (J&J) និង Pfizer តែភាពយឺតយ៉ាវដោយសារការលំបាកក្នុងការធានាការផ្គត់ផ្គង់ដំបូង៕